Тажикстандын коопсуздук кызматы чек арадагы жаңжал боюнча кайрылуу жасады

Тажикстандын Улуттук коопсуздук боюнча мамлекеттик комитетинин чек ара аскерлери Кыргыз мамлекети менен чек арадагы соңку окуялар боюнча билдирүү жасады. Ал Тажикстандын “Ховар” маалымат агенттигинин сайтына жайгаштырылды.

"Акыркы убакта чек ара тилкесиндеги кырдаалдын курчушуна алып келген Кыргыз Республикасынын жарандары жана чек арачылары тарабынан чагымчыл аракеттер көбөйдү", - деп айтылат билдирүүдө.

Жарыяланган маалыматка ылайык, 22-декабрь күнү саат 13:50 чамасында кыргыз номери тагылган Опел үлгүсүндөгү жеңил унаа Тажикстандын Лахш районунун Чашма конушунун аймагында чек арадан мыйзамсыз өткөнү үчүн кармалган. Анын ичинде 4 куралдуу кыргыз чек арачылары болгон.

"Чек араны мыйзамсыз кесип өтүү боюнча сүйлөшүү жана түшүндүрүү иштеринин жүрүшүндө, кыргыз чек арачылары бул аракеттерди өздөрүнүн жетекчилеринин көрсөтмөсү боюнча жасагандыгын айтышкан", - деп айтылат маалыматта. Келишимдерге ылайык, кыргыз чек арачылары Кыргыз өлкөсүнө кайтарылган.

Ошондой эле 22-декабрь күнү Тажикстандын Согди облусунун Хистеварз конушунда Кыргыз өлкөсүнүн номери тагылган күйүүчү май ташыган унаа да чек арадан мыйзамсыз өткөн. Бирок чек арачылардын талабына баш ийбей, качып кетүүгө аракет кылып кармалган. Кармоо учурунда айдоочуга залал келтирилген эмес. Мындан тышкары ведомство дагы бир фактыны келтирет. Анда 22-декабрда саат 23:00 чамасында Согди облусунун Исфара шаарына жакынкы айылдардын бириндеги үйдү Кыргыз жарандары аткылашкан. Ок Кыргыз өлкөсүнүн Май айылынан атылган. Анын кесепетинен үйдүн терезелери сынган, эч ким жабыркаган эмес. Билдирмеге караганда, жогорудагы бардык чек ара окуялары боюнча тараптардын чек ара өкүлдөрүнүн деңгээлинде жумушчу жолугушуулар өткөрүлүүдө.

Эскерте кетсек, 22-декабрда Максат айылында ок атышуудан 47 жаштагы суу ташуучу унаанын айдоочусу жабыркаган. Чек ара кызматынын маалыматы боюнча, Тажикстан Республикасынын чек ара өкүлдөрү тажик аскер кызматкерлеринин аракеттеринин мыйзамсыздыгын жана алардын мыйзамсыз курал колдонгондугун моюнга алышкан. Ошондой эле алар «бул ашынган фактыга жол берген чек арачылар жоопко тартылат» деп ишендирип, бул окуяны Аскердик прокуратурасы иликтерин кабарлаган.