Грузиянын мурдагы президенти Михаил Саакашвили кайра абакка кайтаарын уккандан кийин эс-учун жоготту

Грузиянын камактагы мурдагы президенти Михаил Саакашвили аны аскердик госпиталдан алып кетүүгө келген укук коргоо органдарына каршылык көрсөтүү учурунда эсин жоготту. Бул тууралуу чет элдик басылмалар жазып чыгышты.

Маалыматка ылайык, полиция кызматкерлери аны абакка алып кетүү үчүн келгенде Саакашвилинин кан басымы көтөрүлүп жаткан. Ал полиция кызматкерлерине бул жөнүндө айтканда алар уккан эмес. Андан кийин экс-президент каршылык көрсөтүп жатып эс-учун жоготкон.

Михаил Саакашвили 1-октябрда камакка алынган. Ага бир канча жыл мурун өлтүрүлгөн Сандро Гиргвлиани аттуу банк кызматкеринин иши боюнча айып тагылууда. Саясатчы абакта ачкачылык жарыялаганы белгилүү болгон.

9-ноябрда анын ден соолугу начарлап, абактын ооруканасына которулган.