Сокулукта милиция кызматкери өз үйүндө бычакталды

Сокулук районунун Романовка айылында милиция кызматкери бычакталды. Бул тууралуу Сокулук райондук ички иштер бөлүмү кабарлады.

Билдирүүгө ылайык, 27-декабрда Сокулук РИИБге Романовка айылындагы үйлөрдүн биринде белгисиз адам үй ээсин бычактап салганы тууралуу билдирүү түшкөн. Бул факты Сокулук районунун ички иштер башкармалыгында катталган.

Алдын ала маалыматтарга караганда, белгисиз адам үйгө кирип үй ээсине бычак сайган.

"Жабырлануучу Бишкек шаарынын Ленин райондук милициясынын күзөт кызматынын кызматкери, улук сержант Н.Т. болуп чыкты. Ал оор абалда райондук аймактык ооруканага жеткирилди. Учурда 50 жаштагы С.П. аттуу жаран кылмышка шектелип кармалды. Бардык жагдайлар иликтенип жатат. Экспертиза дайындалды. Тергөө иштери уланууда", - деп билдирди Сокулук РИИБи.