Медербек Саккараев мандат алат. Жогорку Сот соңку чечимди чыгарды

Жогорку Сот БШКнын Медербек Саккараевдин талапкерлигин алуу чечимин жокко чыгарды. Бул тууралуу Жогорку Соттун басма сөз кызматынан билдиришти.

Маалыматка ылайык, Жогорку Сотто Саккараевдин арызы бүгүн, 28-декабрда каралган. Анын жыйынтыгы менен Борбордук шайлоо комиссиясынын 18-декабрдагы Медербек Саккараевдин талапкерлигин алып салуу тууралуу чечимин мыйзамсыз деп таап, жокко чыгарган.

БШК 18-декабрда Саккараевдин казак жарандыгы бардыгы такталган деген негизде, аны талапкер катары каттоо тууралуу чечимди жокко чыгарган. Буга нааразы болгон саясатчы сотко кайрылган. Бишкектин административдик соту анын арызын канааттандырган эмес.

28-ноябрдагы парламенттик шайлоодо №31 Чүй-Кемин округунан Саккараев эң көп добуш алган.