Казакстанда өлүм жазасы жоюлду

29-декабрда Казакстандын президенти Касым-Жомарт Токаев өлүм жазасын алып салуу боюнча мыйзамдарга өзгөртүүлөрдү киргизүү тууралуу мыйзамга кол койду. Бул тууралуу казак басылмалары жазышты.

Маалыматка ылайык, Казакстан парламентинин сенаты 23-декабрда өлкөдө өлүм жазасын толугу менен алып салуу боюнча мыйзамды кабыл алган.

"Бул мыйзамды кабыл алуу менен Казакстан өлүм жазасына мыйзамдуу түрдө тыюу салынган өлкөлөрдүн тобуна кошулду. Мындан тышкары, биздин өлкө өлүм жазасын толугу менен алып салууга багытталган эл аралык кыймылды колдой турганын далилдеп турат", - деген ал кездеги Сенаттын спикери Маулен Ашымбаев.

Белгилей кетсек, 2003-жылдан бери Казакстанда өлүм жазасына мораторий киргизилген, андан бери алардын бири да өлкөдө катталган эмес.