Бишкекте милициянын документин жасалма жол менен алган жаран кармалды

Бишкек шаарында милиция кызматкеринин документин жасалма жол менен жасатып алган жаран кармалды. Бул тууралуу Бишкек шаардык ички иштер башкармалыгынан билдиришти.

"Бишкекте өзүн ИИМдин кызматкеримин деп тааныштырган 1989-жылы туулган У.Д. аттуу жаран кармалды. Ошондой эле кармалган жарандан 8 даана өлчөмдөгү огу бар белгисиз үлгүдөгү тапанча жана шектүү үлгүдөгү маалымкат табылган.

Андан аркы иш-чаранын жүрүшүндө У.Д. аттуу жаранга таандык автоунаага текшерүү жүргүзүлүп, анда "ИИМ" деген жазуусу бар кара түстөгү жилет табылып, алынган. Алынган курал жана ок-дарылар боюнча соттук-баллистикалык экспертиза дайындалды", - деп жазылат билдирүүдө.

Бул боюнча Кылмыш-жаза кодексинин 379-беренесинин ("документтерди жасалмалоо") негизинде кылмыш иши козголгон. Шектүү убактылуу кармоочу жайга киргизилди.