Казакстандын Караганда шаарында да кеч киргенине карабай митингге топтолушууда

Казакстандын Караганда шаарынын түштүк-чыгыш бөлүгүнө бүгүн, 4-январда кечке жуук кеминде 200 киши топтолду. Мындай маалыматты "Азаттыктын" казак кызматы жазды.

Ага ылайык, топтолгондор өлкөдө газдын кымбатташына нааразы болуп митингге чыккан Жанаозен шаарынын жашоочуларына тилектештик кылып келишкенин билдиришкен. Өз кезегинде карагандалык жашоочулар азык-түлүккө болгон баанын кескин кымбатташына да нааразы экендигин билдиришкен.

"Нааразычылык акциясына чыккандар Караганда облусунун акими Женис Касымбектин келишин талап кылышууда. Азыр эл топтолгон жайда акимдин өкүлдөрү бар. Бийлик элди тарап кетүүгө чакырууда, бирок алар тарабай жатат", - деп жазылат маалыматта.

Эске салсак, Казакстанда жыл нааразычылык акциясы менен башталды. Тактап айтканда, 1-январдан тартып аталган өлкөдө газдын баасы 120 теңгеге чыккан. Буга нааразы болуп 2-январда Жанаозен шаарынын жашоочулары митингге чыгышкан. Ошондон бери митингчилерге өлкөнүн башка шаарларынын жашоочулары да кошулуп, нааразычылык акциясы уланууда. Кененирээк бул шилтемеден окусаңыз болот.