Алматынын түнү. Казакстан бийлиги митингчилерди күч менен таратуу аракетин көрүүдө

Казакстандын Мангыстау облусунда 2-январда башталган митинг өлкөнүн дээрлик бардык аймагына жайылды. 4-январдын түнүндө ондогон шаар, аймактарда жашоочулар газдын, азык-түлүктүн кымбатташына нааразы болуп чыгышкан.

Чогулган тараптын саны улам көбөйүп, алар облустук, президенттик администрацияларга жакындаганда күч структуралары аларды таратуу чараларын колдонушту. Жергиликтүү айрым басылмалардын маалыматына ылайык, Алматыда полициянын бир нече унаасы күйдү. Алматы, Нур-Султан шаарларында топтолгон адамдарды таратуу үчүн көздөн жаш чыгаруучу газдар колдонулганы маалым болду.

Ал арада Актау шаарынан видео тарады. Анда митингчилер менен күч органдарынын кызматкерлери өтө жакын турушкан. Митингчилер аларды "азаматтар" деп сүрөп жатышканы видеодон көрүнөт. Ошол эле учурда тартип сакчылары митингчилерди таратуу аракетин көрүшкөн жок.