Казакстандагы башаламандык: 300дөн ашык полиция кызматкерлери, жоокерлер жаракаттарды алышты. Дагы 8и каза болду

Казакстандагы массалык башаламандыктан полиция кызматкерлери, Улуттук гвардиянын жоокерлери каза болушту. Бул туурасында Казак өлкөсүнүн Ички иштер министрлигине шилтеме берүү менен бир катар маалымат каражаттары жазып чыгышты.

Андагы маалыматта 8 тартип сакчысы, жоокери курман болгону айтылат. Андан тышкары күч органдарынын 317 мүчөсү ар кандай жаракаттарды алышканы белгиленди.

Митинг тууралуу кыскача:

Казакстанда 1-январдан тарта газдын кымбатташы себептүү нааразычылык акциясы башталып, 4-январда митинг курчуп, өлкөдө башаламандык орун алды. Бүгүн, 5-январда казак өкмөтү отставкага кетти. Бирок эл дагы деле тынчтана элек, башаламандык уланып, демонстранттар бир катар имараттарды басып алышты.

Ал арада президент Касым-Жомарт Токаев кайрылуу жасап, кагылышууда жабыркагандар, каза болгондор бар экенин айтып, аскер кызматкерлерине, укук коргоочуларга ыраазычылыгын билдирди. Ал мындай кырдаалда өлкөдөн тышкары чыкпай турганын, эл ага колдоо көрсөтөрүнө ишенерин белгиледи.

Абал курчуганына байланыштуу Нурсултан Назарбаевдин кызы менен күйөө баласы дагы өлкөдөн чыкканы айтылды. Ал эми тунгуч президент өзү чет өлкөгө дарылануу үчүн чыгып кетүүгө даяр экени кабарланды. Андан кийин Казакстан боюнча өзгөчө абал жарыяланды.

Кийинчерээк Касым-Жомарт Токаев өлкөгө террордук чабуул болгонун, мындан улам Жамааттык коопсуздук келишим уюмундагы өнөктөштөргө кайрылууну ылайык көргөнүн айтты.