"Акча төлөнүп, энергетикалык суусундуктар берилгенин айтышты". Шымкентте митингчилер кармалды

Казакстандын Шымкент шаарында массалык башаламандык учурунда демонстранттарга курал-жарак берип жаткан видео интернетке жарыяланды. Андан номери белгисиз болгон унаадан митингчилер каражаттарды алып жатканын көрүүгө болот.

Бүгүн, 7-январга карата тополоң чыккан аймактарда атайын операция жүргүзүлүп, демонстранттар колго түшүрүлүүдө. Алсак, Шымкент шаарында кармалган митингчилер башаламандыкка чыкканы үчүн аларга акча төлөнүп, энергетикалык суусундуктар берилгенин айтышкан. Бул туурасында Шымкент шаарынын мэринин орун басары билдирди деп жазышат казак маалымат каражаттары.

"Азыр чагымчылар кармалып жатат. Аларга акча төлөнүп, энергетикалык суусундуктар берилгенин айтышып, андан кийин өздөрүн башкара албай калышканын айтышууда. Жаштардын мыйзам бузбоосу үчүн ата-энелерди көзөмөлгө алууга чакырабыз", - деген мэрдин орун басары.

Аталган шаарда башаламандыктан улам 60тан ашуун адам жабыркаганы маалымдалган.