"4 миңдей жаран кармалып, Алматыда ок атышуу уланууда". Казакстанда 8-январга карата абал

Бүгүн, 8-январга карата Казакстандагы абал тууралуу казак басылмалары жазып чыгышты.

Маалыматка ылайык, айрым аймактарда террорчуларга каршы операциялар, согушкерлерди кармоо жана жок кылуу уланууда. Жалпысынан 4 миңдей террорчу аталган жаран кармалганын жазышууда. Алардын айрымдары өмүр бою эркинен ажыратылышы мүмкүн. ЖККУнун (ред.: Жамааттык коопсуздук келишим уюму) бейпилдик күчтөрүнүн бөлүктөрү республикага келүүнү улантууда, аскерлердин бир бөлүгү өлкөнүн инфраструктурасын коргоо боюнча тапшырмаларды аткарууга киришти. ЖККУнун Казакстандагы бейпилдик миссиясын генерал-полковник Андрей Сердюков жетектейт.

Алматы шаарында ок атышуу уланууда

Алматы шаарында террорчуларга каршы операция уланууда. Маалыматка ылайык, шаардыктар полиция кызматына шектүү адамдардын тобун аныктоого жардам беришүүдө. Кылмыштуу топтор чакан аянттарда, сейил бактарда жашынып, коюу тумандын болушу милициянын ишин кыйындатууда. Азырынча полиция кызматы митингчилердин арасында канча адам кармалганы тууралуу так маалымат бере элек.

Талдыкорганда СИЗОнун имаратын басып алууга аракет жасалды

Казакстандын Ички иштер министрлигинин маалыматы боюнча, 15 куралчан адам СИЗОнун имаратын басып алууга аракет кылган. Топтун үч мүчөсү каза болду. Калгандары ар кандай оордуктагы жаракат алышты. Полиция кызматынан да жабыркагандар бар: бир адам каза болуп, эки офицер жарадар болгон. СИЗОнун аймагында ыкчам-тергөө тобу иштеп жатат.

"Күч түзүмдөрүнүн жана акимчиликтердин объектилерин басып алуу аракеттери болгон. Кагылышуунун натыйжасында полиция менен аскер кызматкерлери жапа чеккен. Террорчуларга каршы штаб түзүлдү. Анын курамына күч структураларынын жана аскер бөлүктөрүнүн бардык өкүлдөрү кирет. Облус боюнча электр энергиясы, суу жана жылуулук менен камсыздоодо үзгүлтүккө учураган жок. Керектүү товарларды саткан дүкөндөр, медициналык мекемелер ишин улантууда", - дейт Алматы облусунун акими Канат Бозумбаев.

Азырынча Казакстандын башка аймактарында абал туруктуу.