Казакстанда кармалды делген Захир Убуровдун агасы: "Видеодогу адам иним эмес"

Буга чейин Казакстандагы телеканалдардын биринде баш аламандыкка катышкандардын бири Кыргыз өлкөсүнөн учуп баргандыгын айткан видео көрсөтүлгөн. Андан соң интернет колдонуучулары видеодогу жаран жаз музыканты Викрам Рузахунов экендигин жазышкан.

Казакстандын укук коргоо органдары белгилүү кыргыз музыканты Викрам Рузахуновдун кармалганы тууралуу маалымат чындыкка дал келбейт деп билдиришкени Казакстандын жергиликтүү Телеграм-каналына жарыяланган.

Алардын айтымында, кармалган жаран 1990-жылы туулган Закир Убуров.

Ал эми Кыргыз өлкөсүндө Закир Убуровдун бир тууган агасы видеодогу жаран иниси эмес экендигин айтып чыкты.

"Закир Убуров менин иним болот. Ал жарым жылдан бери Алматыда базарда идиш сатып иштейт. Эки ай мурун Кыргыз өлкөсүнө келип кеткен. Видеодогу жаран ал эмес", - деди анын бир тууган агасы Тахир Юбуров.

Бул боюнча Тышкы иштер министрлиги жана ИИМ аталган жарандын кармалышы боюнча жагдайларын тактоого тиешелүү чаралар жүргүзүлүп жатканын билдиришти.