Бириккен улуттар уюму: "Дүйнөдө азык-түлүктүн баасы кескин кымбаттады"

2021-жылы дүйнөдө азык-түлүктүн баалары рекорддук чекке жетти. Мындай маалымат Бириккен улуттар уюмунун сайтына жарыяланды.

Маалыматка ылайык, 2021-жылы азык-түлүктүн дүйнөлүк баасы 28,1 пайызга жогорулаган. Муну менен бул 2012-жылдан берки кескин түрдө кымбаттоо болуп калды.

Декабрь айында азык-түлүк бааларынын индекси орточо эсеп менен 133,7 пунктту түзгөн. Ноябрь айына салыштырмалуу 0,9 пайызга төмөн, бирок 2020-жылдын декабрына караганда 23,1 пайызга жогору болгон.

"Жыл ичинде дан эгиндердин баасы 27,2 пайызга жогорулады, бул 2012-жылдан берки рекорддук көрсөткүч. Жүгөрү жана буудайдын баасы 44,1 жана 31,3 пайыз, сүт азыктары 16,9 пайыз, эт 12,7 пайызга кымбаттады. Өзгөчө өсүмдүк майы жана кумшекердин баалары өстү. Тагыраагы, өсүмдүк майы 65,8 пайызга, канттын баасы 37,5 пайызга көтөрүлгөн. Ал эми күрүчтүн баасы 4 пайызга төмөндөгөн. Кой, уй жана тоок эттери эң чоң өсүштү көрсөттү", - деп айтылат маалыматта.

Эксперттер баанын кымбатташын өндүрүүчүлөрдүн, анын ичинде энергетикага жана транспортко кеткен жалпы чыгымдардын өсүшү менен түшүндүрүшкөн. Мындан тышкары буудай түшүмүнүн жетишсиздиги жана борборлоштурулган сатып алуулар таасир эткен.