Асел Кадырбекованын көзүнө операция жасалат

Ырчы Асел Кадырбекова көзүнө операция жасатат. Хирургиялык кийлигишүү Түркияда жасаларын ырчы социалдык тармактагы баракчасына жазды.

Белгилүү болгондой, Асел Кадырбекова Түркияга медициналык кароодон өтүүгө барды. Текшерүүдөн өткөн ырчы бүгүн, 12-январда операция болорун белгиледи.

Белгилей кетсек, Асел Кадырбекова 2020-жылы жол кырсыгына кабылгандан тарта ден соолугун калыбына келтирип жүрөт.

Ырчы кабылган жол кырсыгынын чоо-жайы:

2020-жылы 26-июнда Бишкектеги Медеров жана Тыныстанов көчөлөрүнүн кесилишинде Toyota Camry менен Honda Odyssey автоунаалары кагылышкан. Анын кесепетинен Toyota Camry унаасында рулда бараткан Асел Кадырбекова катуу жаракат алган.

Ал эми Honda Odyssey унаасынын айдоочусуна кылмыш иши козголуп, убактылуу бир айга камакка алынган. Кийинчерээк Асел Кадырбекованын үй-бүлөсү жол кырсыгына күнөөлүү айдоочуну кечиргени, тосмо арыз жазганы маалымдалган. Иш өндүрүштөн кыскартылган.