Окумуштуулар дүйнөлүк океандагы температура рекорддук көрсөткүчкө жеткенин айтышууда

Дүйнөлүк океандын бетинин температурасы жогорулап, акыркы жылдардагы рекорддорду жаңылады. Бул тууралуу атайын адистердин маалыматына таянып, дүйнөлүк басылмалар жазып чыгышты.

Маалыматка ылайык, адистер океан бетинин температурасы болжолдуу түрдө 1950-жылдын аягынан тарта тынымсыз жогорулап келе жатканын айтышкан. Изилдөөгө 14 институттун 23 илимий кызматкери катышкан. Алар океандагы температуранын өзгөрүшүн адамдын иш-аракетинен улам деп эсептешет.

"Океандагы топтолгон энергиянын көбөйүшү атмосферага бир топ таасирин тийгизет. Мисалы тез-тез болуучу жана күчтүү бороон-чапкындарга алып келет. Ошондой эле сел жана нөшөрлүү жаан-чачындардын коркунучун жогорулатат. Океандагы температуранын жогорулашынан улам суу кеңейип, деңиз деңгээлинин көтөрүлүшүнө түрткү болот", - деп айтылат маалыматта.