Саламаттыкты сактоо министрлигине караштуу 19 мекеме оңдолуп, 9 мекеменин курулушу жүрүп жатат

Саламаттыкты сактоо министрлигине караштуу 19 мекеме оңдоо-түзөө иштеринен өтүп, 9 мекеменин курулушу жүрүп жатат. Бул тууралуу 20-ноябрдагы маалымат жыйында саламаттыкты сактоо министри Динара Сагынбаева билдирди.

“Өкмөт тарабынан 2013-жылы медициналык имараттарды оңдоо үчүн 456 миллион сом бөлүнгөн. Бүгүнкү күндө 19 мекеме оңдоп-түзөөдөн өтүп, дагы 9 мекеме курулуп жатат. Жыл аягына чейин бардык иштер бүтөт деген үмүттөбүз. Бөлүнгөн каражаттын 85 пайызы колдонулду”,- деди ал.

Мындан сырткары министрлик инвестиция тартуу боюнча иш алып барып жатканын кошумчалады.

“2013-жылы Улуттук госпиталдын 150 орундуу корпусу Кытайдан бөлүнгөн гранттын эсебинен оңдолду. Ошондой эле немец өнүктүрүү банкынын жардамы менен Фтизиатрия борборунун алдындагы референс лабораториясы ишке киргизилди. Сауд Арабия мамлекети Кара-Кулжа жана Түп районундагы үй-бүлөлүк медициналык бейтапканаларынын курулуштары үчүн грант бөлдү. Ал эки айдын ичинде ишке берилет”,- деди Сагынбаева.