Швециядан уурдалган кымбат унаалар Бишкектеги автосалондордун биринен табылды

Швециядан уурдалган 5 премиум-класстагы унаалар Бишкектеги автосалондордун биринен табылды. Бул тууралуу Ички иштер министрлигинин басма сөз кызматынан билдиришти.

Маалыматка ылайык, Ички иштер министрлигинин Интерполдун Улуттук борбордук бюросунун кызматкерлери менен бирге жүргүзгөн издөө иш-чараларынын натыйжасында, эл аралык издөөдө жүргөн бир нече унаалар Евро Биримдикке кирген өлкөлөрдөн Кыргыз Республикасынын аймагына алынып келип жатканы аныкталган.

Анын алкагында 2021-жылдын 30-декабрында Бишкек шаарындагы автосалондордун бирине тинтүү жүргүзүлүп, 18 унаа камакка коюлган. Анын ичинде 2020-2021-жылдары Швециядан уурдалган 5 премиум-класстагы унаалар дагы болгон.

Учурда унааларды уурдоого тиешеси бар адамдарды аныктоо жана Интерпол тарабынан башка унааларды издөө боюнча иликтөө иш-чаралары жүргүзүлүүдө.