Казакстанда Нурсултан Назарбаевдин кызына таандык болгон компаниянын директору өз жанын кыйды

Нур-Султан шаарында казакстандык "Оператор РОП" компаниясынын башкаруучу директору Руслан Шамшиев өз жанын кыйды. Бул тууралуу аталган өлкөнүн басылмалары жазышты.

Маалыматка ылайык, Руслан Шамшиев 43 жашта болгон. Ал Нур-Султандагы "Astana Apartments" бизнес борборунун 6-кабатында жайгашкан кеңсесинде өз жанын кыйган. Бул боюнча полиция кылмыш ишин козгоду.

Казакстанда январь айынын башында орун алган тополоңдон кийин Коррупцияга каршы күрөшүү агенттиги Казакстандын экология, геология жана жаратылыш ресурстары боюнча вице-министри Ахметжан Примкулов менен "Оператор РОП" компаниясынын төрагасы Медет Кумаргалиевдин "коррупциялык кылмыштарды жасаган" деген шек менен кармалганын жарыялаган.

"Оператор РОП" Казакстанда тополоң болгонго чейин таштандыларды чогултуу менен алектенген компания. Жергиликтүү басылмалар компания Казакстандын биринчи президентинин кичүү кызы Алия Назарбаевага тиешеси бар экенин жазышты.