Камчыбек Ташиевдин иниси Шаирбек Ташиев мандатын тапшыруу боюнча фракцияга кайрылуу жасады

Жогорку Кеңештин депутаты Шаирбек Ташиев мандатын тапшыруу боюнча кайрылуу жасады. Бул тууралуу Жогорку Кеңештин депутаты Бакыт Төрөбаев социалдык тармактагы баракчасына жазды.

"Бүгүн, 26-январда Жогорку Кеңештин “Ата-Журт Кыргызстан” парламенттик фракциясынын лидери катары менин атыма фракциянын мүчөсү Ташиев Шаирбек Кыдыршаевичтен Жогорку Кеңештин депутатынын мандатын тапшыруу боюнча чечим кабыл алгандыгы тууралуу кайрылуу келип түштү. Мындан сырткары өлкөбүздүн булуң-бурчундагы шайлоочулардан да кайрылуулар түшүп жатат. Бул маселе фракциянын жыйынында каралат", - деп жазды Төрөбаев.

23-январда Улуттук коопсуздук мамлекеттик комитетинин төрагасы Камчыбек Ташиев Temirov Live каналы жасаган иликтөөдө айтылган ишканалар тууралуу маалымат жыйын берип жатып, иниси Шаирбек Ташиевден депутаттык мандатын тапшыруусун суранганын айткан.