Саат 21:50гө карата Тажикстан тарап Кара-Бак айылы тарапка 3 БМП, 1 БТР, 5 миномёт жардыруучу оор техникаларын алып келди

Саат 21:50 чамасында Баткен районунун Кара-Бак айылы менен чектешкен Тажикстандын Ляккон айылынын чек ара постунда тажик аскерлери 3 БМП, 1 БТР, 5 миномёт жардыруучу оор техникалары менен даярданып жатканы кабарланды. Бул тууралуу президенттин Баткен облусундагы ыйгарым укуктуу өкүлчүлүгүнөн кабарлашты.

"Саат 20:49да №2001 аскер бөлүгүнүн берген маалыматына ылайык, Көк-Таш айылындагы чек ара заставасында ок атуу болуп жатканын, ошондой эле Төрт-Көчө жана Үч-дөбө тилкелеринде Тажикстандын чек арачылары тарабынан миномёт жана гранатомёт колдонуп жаткандыгы тууралуу маалымат берилген.

Саат 21:50 чамасында Баткен районунун Кара-Бак айылы менен чектешкен Тажик Республикасынын Ляккон айылынын чек ара постунда тажик аскерлери 3 БМП, 1 БТР, 5 миномёт жардыруучу оор техникалары менен даярданып жаткандыгын билдирген", - деп жазылат билдирүүдө.

Бүгүн, 27-январда Тажикстандын аскерлери Ош-Исфана жолун тосуп алгандыгы кабарланган. Чек ара кызматынан Төрт-Көчөдө абал чыңалууда экенин билдирип, Тажикстан тарап миномёт жана гранатомётторду колдонуп жатканын билдирди.