Жалал-Абадда мыйзамсыз сакталган 24 ок атуучу курал алынды

Жалал-Абад облусунун аймагында үстүбүздөгү жылдын 12-27-январь күндөрү "Арсенал" аталышындагы профилактикалык багыттагы иш-чара өткөрүлдү. Бул тууралуу Жалал-Абад ОИИБинен билдиришти.

Аталган иш-чаранын жүрүшүндө жергиликтүү шаар-райондук ички иштер бөлүмдөрүнүн кызматкерлери жана коомчулук тарабынан жүргүзүлгөн алдын алуу жана түшүндүрүү иштеринин натыйжасында жарандар тарабынан 23 ок атуучу куралдар өз ыктыяры менен тапшырылган, мыйзамсыз сакталгандыгы үчүн 1 курал алынган. Анын ичинде – 2 сайлуу, - 2 даана травматикалык жана – 20 даана сайсыз куралдар алынган.

Андан сырткары каттоодо турган - 2679 мергенчиликти сүйүүчүлөрдүн 2905 ок атуучу куралдары, 304 газотравматикалык куралдардын сактоо эрежелери жана мөөнөттөрү текшерилип, Кыргыз Республикасынын Укук бузуулар Кодексинин негизинде – 194 протокол түзүлүп, 171 миң сом айып салынган.

Белгилей кетсек, табылып алынган, мыйзамсыз сакталган ок атуучу куралдарды өз ыктыяры менен тапшырган атуулдар Кыргыз Республикасынын мыйзамдарына ылайык кылмыш жоопкерчилигинен бошотулат.