Бишкекте күйөөсү аялын жаткыра тепкен видео тарады. Аялы арыз жазуудан баш тартты (видео)

Социалдык тармактарда Бишкек шаарында күйөөсү аялын "уктата тепкен" видео тарады. Видео 30-январь күнү Бишкектеги Ахунбаев жана Чапаев көчөлөрүнүн кесилишинде тартылган.

Видеодо көрүнгөндөй, бир адам жанындагылар менен жулкулдашып, андан кийин жерден туруп келе жаткан аялды башка тепкен. Аял ошол жерден эс-учун жоготкон.

Бул боюнча Ленин райондук ички иштер бөлүмүнө байланыштык. Милициянын билдиришинче, 30-январь күнү саат 23:00 чамасында Бишкек шаарынын Ички иштер башкы башкармалыгынын 102 кызматына Ахунбаев-Чапаев көчөлөрүнүн кесилишине жакын жерде күйөөсү аялын сабап жаткандыгы тууралуу чакыруу түшкөн.

"Бишкек шаарынын Ленин РИИБинин ыкчам тергөө тобу дароо чакыруу болгон жерге барып, ошол эле күнү саат 17:30 чамасында жубайлар досторунун үйүндө конокто болушкан. Ошол учурда жубайлардын ортосунда оозеки чыр-чатак болуп, аялы көчөгө чыгып кеткенден кийин, күйөөсү анын артынан ээрчип келип, ага карата физикалык күч колдоно баштаган. Бул факты реестрге катталды", - деп билдиришти Ленин РИИБинен.

Токмоктолгон аял милицияга арыз берүүдөн баш тартып, эч кандай дооматы жок экенин билдирген. Учурда тергөө иштери уланууда.