Тажикстандын башкы прокурору кыргыз чек арачыларына жана айрым жарандарына кылмыш иши козголгонун айтты

Тажикстан кыргыз чек арачыларына жана айрым Кыргыз жарандарына кылмыш ишин козгоду. Бул тууралуу Тажикстандын башкы прокурору Юсуф Рахмонго шилтеме берүү менен бир катар басылмалар жазып чыгышты.

Маалыматка ылайык, 2-февралда аталган өлкөнүн башкы прокурору маалымат жыйын өткөрдү.

"Кыргыз өлкөсүнүн чек арачыларына жана айрым жарандарына айрым кылмыштар боюнча айып тагылып, тергөө иштери жүрүп жатат", - деген Юсуф Рахмон.

Бирок ал кылмыш иши боюнча канча адам, кандай беренелер боюнча айыпталып жатканын тактаган эмес. Бул кылмыш иштери январдын аягында чыккан чек ара чатагына тиешелүү экени белгилүү. Ошондой эле ал 2021-жылдын апрелиндеги чек ара жаңжалынан улам козголгон кылмыш иштери дагы бар экенин айтты. Андан тышкары чек ара чатагы боюнча өткөн жылдын апрель айында да иш козголуп, айрымдары аныкталып кармалса, айрымдары изделип жатканын, табылса сөзсүз түрдө жоопко тартыларын белгилеген.

Эске салсак, 27-январда Баткен-Исфана жолунун Баткен районунун Төрт-Көчө тилкеси Тажикстандын чек арачылары тарабынан тосулуп, ок атуучу куралдардан ок чыгарышкан. Анын кесепетинен Баткендин тургундары 2 миллион 912 миң сом зыян тартты.