Орусияга сатылып кеткен 2 адам Бишкекке алынып келинди

Москвага тилемчилик кылдыруу үчүн сатылып кеткен Токмок шаарындагы психоневрологиялык №2-жатак-үйдүн 2 жашоочусу Бишкекке алынып келинди. Бул тууралуу бүгүн, 21-ноябрдагы маалымат жыйынында социалдык өнүгүү министри Кудайберген Базарбаев билдирди. 

24 жаштагы М.Ольганын агрессивдүү жүрүш-турушунан улам андан апасы менен чоң энеси баш тарткан. Ал 1997-жылы психоневрологиялык борборго жаткырылган. 47 жаштагы М.Лариса  күйөөсү менен ажырашкан. 2 баласы Германияда жашайт. 2001-жылы психоневрологиялык диспансерге жаткырылган.

Эске салсак, ушул жылдын октябрь айында Токмоктогу жатак-үйдүн директору II топтогу эки майыпты 500 долларга Орусияга сатып жибергени айтылган. Алар Москванын метролорундагы станцияларда кайырчылык кылышмак. Учурда аталган факты боюнча кылмыш иши козголуп, тергөө жүрүп жатат.