Медет Садыркуловдун өлүмү боюнча иш сотко өттү

Президенттик аппараттын экс-жетекчиси Медет Садыркуловдун өлүмүнө шектелген Санжар Сапарбековго козголгон кылмыш иши сотко өттү. Бул тууралуу саясатчынын аялы Айнагүл Садыркулова социалдык баракчасына жазды.

"Бүгүн менин жолдошум, үч кыздын атасы, алты неберенин чоң атасы Садыркулов Медет Чакановичтин өлүмүнө себепкер болгон Санжар Сапарбековдун соту башталат. Соттук отурум канчага созуларын билбейм, бирок бул анчалык деле маанилүү эмес, эң негизгиси сот адилеттүү жана калыс болсун", - деген билдирүүсүн жазды.

Анын айтымында, сот отуруму Аламүдүн райондук сотунда судья Бакыт Касымалиевдин төрагалыгы алдында өтөт.

Медет Садыркулов 2007-жылдын 16-апрелинен 2009-жылдын 8-январына чейин президенттин администрация жетекчиси кызматында иштеп келген. 2009-жылдын 8-январында өз каалоосу менен отставкага кеткен. Ал эми 2009-жылы 13-мартта өлтүрүлгөн. Бул кылмышка шектелгендердин бири Рустам Сайдиев сыртынан соттолгон.