Ошто бейтааныш аялды көчөдө сабаган уюшкан кылмыштуу топтун мүчөсү кармалды

Ошто бейтааныш аялды сабаган уюшкан кылмыштуу топтун мүчөсү кармалды. Бул тууралуу Ош шаардык ички иштер башкармалыгынын басма сөз кызматы билдирди.

Маалыматка ылайык, Ош шаардык ички иштер башкармалыгына 38 жаштагы аял кайрылып, 25-январь күнү аны Ош шаарынын Масалиев көчөсүндө белгисиз адам, сөгүп, кийин чачынан сүйрөп сабагандыгын айткан.

Издөө иштеринин натыйжасында шектүү катары 8-февралда Бишкек шаарында бекинип жүргөн жеринен мурда 7 жолу сот жообуна тартылган, туруктуу иштеген жери жок Д.А. аттуу Өзгөн районунун 1982-жылы туулган тургуну кармалган.

Ал ИИМдин атайын тизмесинде уюшкан кылмыштуу топтун мүчөсү катары тизмеде экендиги аныкталган.

Шектүү 7 жолу соттолгон, 3 жолу бейбаштык жана тоноо, наркотикалык заттарды колдонуу, опузалап акча талап кылуу жана башка бирөөнүн мүлкүн атайылап жок кылгандыгы үчүн соттолгон.

Учурда ал Ош шаардык ички иштер башкармалыгынын убактылуу кармоочу жайына киргизилип, тиешелүү тергөө иштери жүргүзүлүп жатат.