"Месси пенальтини аткара албай". Чемпиондор Лигасынын 1/8 финалындагы оюндун жыйынтыктары (видео)

Бүгүн, 16-февралга караган түнү Чемпиондор Лигасынын 1/8 финалынын биринчи күндүк оюндары өттү.

Франциянын "ПСЖ" командасы өз үйүндө фаворит командалардын бири болгон "Реал Мадрид" клубун кабыл алып, оюн 1:0 эсебинде париждиктердин пайдасына аяктады. Биринчи бөлүк топко ээлик кылуу жана дарбазага соккулардын саны боюнча париждиктердин артыкчылыгы менен өттү. Экинчи бөлүктүн ортосунда талаа ээлери пенальти тебүү укугуна ээ болушту. Бирок Лионель Месси пенальтини голго айланта алган жок. Кошумча убакытта гана чабуулчу Киллиан Мбаппе жеңиш голун киргизди.

Бул эки команданын жооптук оюну 9-март күнү Испаниянын Мадрид шаарында өтөт.

"ПСЖ" - "Реал Мадрид" (1:0);

Голдор: Киллиан Мбаппе (90+4-мүнөттө).

Экинчи жуптук оюнда Португалиянын "Спортинг" командасы Лиссабон шаарында "Манчестер Сити" клубун кабыл алды. Оюн 0:5 эсебинде коноктордун жеңиши менен аяктады. "Манчестер Сити" биринчи бөлүктө эле төрт гол киргизди. Тыныгуудан кийин жаны тынбаган "Манчестер Ситинин" оюнчулары дагы бир гол киргизүүгө жетишти.

"Спортинг" - "Манчестер Сити" (0:5);

Голдор: Рияд Марез (7-м), Бернарду Силва (17, 44-м), Фил Фоден (32-м), Рахим Стерлинг (58-м).

Бул эки команданын жооптук оюну 9-мартта Манчестер шаарындагы "Этихад" стадионунда өтөт.