Кримтөбөл "Женгонун" кылмыштуу тобунун мүчөлөрү ишкерлерден опузалап акча алып жаткан жеринен кармалды

Пара талап кылуу фактысы боюнча уюшкан кылмыштуу топтун мүчөлөрү кармалды. Бул тууралуу Улуттук коопсуздук боюнча мамлекеттик комитеттин басма сөз кызматынан билдиришти.

Маалыматка ылайык, кылмышка шектүүлөр Ош облусунун Кара-Суу районундагы жеке ишкерлерден коркутуу жолу менен акча талап кылышкан. Кылмыш-жаза кодексинин 208-беренеси (опузалап пара талап кылуу) боюнча каралган кылмыш ишинин материалдарынын алкагында "Женго" каймана аттуу Кадыр Досоновдун уюшкан кылмыштуу тобунун активдүү мүчөлөрү 1993-жылы туулган А.у.Э. жана 1992-жылы туулган Р.Э.Р. кармалган.

"Кадыр Досоновдун уюшкан кылмыштуу тобунун активдүү мүчөлөрү Ош облусунун Кара-Суу районунун Нариман айыл аймагында А.А.И. аттуу адамдан акча алып жаткан жеринен кармалды.

Алар УКМКнын тергөө абагына киргизилди. Учурда уюшкан кылмыштуу топтун мыйзамсыз иштерине тиешеси бар башка фактыларды жана башка адамдарды аныктоого багытталган тиешелүү тергөө ыкчам иш-чаралары жүргүзүлүүдө", - деп айтылат маалыматта.