"Porsche, Audi, Bentley". Атлантика океанында 4 миң кымбат унаа жүктөлгөн кеме өрттөнүүдө (фото)

Португалиядагы Азор аралдарынын жээгинде миңдеген кымбат баалуу унаалары бар кемеде чыккан өрттү куткаруучулар бешинчи күндөн бери өчүрүүгө аракет кылып жатышат. Бул тууралуу чет элдик басылмалар жазышты.

Porsche, Audi жана Bentley маркасындагы чет элдик унаалар менен кошо 4000дей унааны ташыган Felicity Ace кемеси 16-февралда Атлантика океанынын ортосунда күйүп кеткен. Борттогу 22 экипаж мүчөсү ошол эле күнү эвакуацияланган.

Кемеге барып өрттү өчүрүү азырынча кооптуу бойдон калууда. Өрт электромобилдердин батареяларынан келип чыгышы мүмкүн экени болжолдонууда.

Кемеге ээлик кылган Сингапурдагы "MOL Ship Management" (MOL) компаниясынын өкүлү өрттүн себебин иликтөөгө бир нече ай керектелерин билдирген. Панама желеги астындагы кеме Европа өлкөлөрүнүн бирине же Багам аралдарына барары белгиленген.