Түркия Орусиянын Донецк жана Луганск республикаларын таануу чечимине реакция жасады

Түркия Орусиянын президенти Владимир Путиндин Донецк жана Луганск республикаларынын көз карандысыздыгын таануу чечимин айыптады. Бул тууралуу чет элдик басылмалар жазышты.

Маалыматка ылайык, Түркиянын Тышкы иштер министрлиги Москванын аракеттерин "кабыл алынгыс" деп атаган.

"Орусиянын Донецк жана Луганск деп аталган республикаларын таануу чечими Минск келишимдерине карама-каршы келет жана Украинанын саясий биримдигин жана аймактык бүтүндүгүн ачык бузууну билдирет. Орусиянын чечими кабыл алынгыс жана биз бул чечимди четке кагабыз”, - деп айтылат Түркиянын Тышкы иштер министрлигинин билдирүүсүндө.

Түркиянын Тышкы иштер министрлиги ошондой эле Түркия Украинанын саясий биримдигин жана аймактык бүтүндүгүн сактоо боюнча өзүнүн чечкиндүүлүгүн ырастап, бардык кызыкдар тараптарды акыл-эс менен иш алып барууга жана эл аралык мыйзамдарды сактоого чакырганын белгилеген.

Буга чейин Орусиянын президенти Владимир Путин Коопсуздук кеңешинин жыйынында Донецк жана Луганск элдик республикаларын таануу жарлыгына кол койгон.