Украина-Орусия жаңжалы: "Талибан" кыймылы алгачкы жолу үн катты

Ооганстанды басып алган "Талибан" кыймылы Украинадагы кырдаал боюнча үн катты. Бул тууралуу чет элдик басылмалар жазышты.

Маалыматка ылайык, "Талибан" кыймылы тараптарды согуштук аракеттерди токтотууга чакырган.

"Биз Украинада болуп жаткан кырдаалга кылдат байкоо салып жатабыз. Карапайым калктын жоготууларынан кооптонуу менен, жаңжалдашкан тараптарды катуу согуштук аракеттерден алыс болууга чакырабыз", - деп айтылат "Талибан" кыймылынын билдирүүсүндө.

Ошондой эле талибдер эки өлкө ортосундагы маселелерди тынчтык жолу менен чечүүгө чакырды.

"Талибан" кыймылы террордук ишмердүүлүгү үчүн БУУнун санкцияларына кирген.

Маалымат үчүн: "Талибан" кыймылы Кыргыз өлкөсүнүн аймагында террордук жана экстремисттик уюм катары таанылып, ишмердүүлүгүнө тыюу салынган.