Бир күн мурда Бишкекте өрт чыккан батирден аялдын жансыз денеси табылган. Маркумдун өлүмүнө шектүү кармалды

Бир күн мурда Бишкекте батирден өрт чыгып, аялдын жансыз денеси табылганы кабарланган. Бүгүн, 27-февралда маркум киши колдуу каза болгону милиция тарабынан белгилүү болду.

Октябрь РИИБинин маалымат кызматынан кабарлашкандай, 26-февралда саат 08:30 чамасында Бишкек ШИИББинин нөөмөт бөлүмүнө билдирүү түшкөн. Анда 3-кичи райондогу көп кабаттуу турак үйлөрдүн бириндеги батирден өрт чыгып, бир кишинин жансыз денеси аныкталганы кабарланган.

"Жерине ыкчам топ барып 1991-жылы туулган А.С. аттуу кыздын жансыз денесин аныкташкан. Маркумдун денесине сырттан кароо жүргүзгөндө көк ала тактар бар экени белгилүү болду.

Бул факты Кылмыштардын бирдиктүү реестрине 122-берене (адам өлтүрүү) менен катталып, сотко чейинки тергөө иштери башталды.

Кылмышка шектелип 2003-жылы туулган А.И. кармалып, убактылуу кармоочу жайга киргизилди. Учурда тергөө амалдары улантылууда, тиешелүү экспертизалар дайындалды", - дешет мекемеден.