Володимир Зеленський Запорожье атомдук электростанциясындагы кырдаал боюнча кайрылуу жасады

Орусиянын аскерлеринин аткылоосунан улам Запорожье атомдук электростанциясынан өрт чыкты. Буга байланыштуу Украинанын президенти Володимир Зеленський кайрылуу жасады.

Анын айтымында, ал атомдук электростанцияда 6 энергоблок бар.

"Орусиялык танктар Запорожье атомдук электростанциясын аткылап жатат. Ал жакта 6 энергоблок бар", - деп билдирген ал.

Ошондой эле ал Чернобыль окуясында бир энергоблок жарылганын, анын кесепети кандай болгонун эскерткен.

Запорожье атомдук электростанциясы - Европадагы эң чоң атомдук электростанция болуп саналат.

Эске салсак, 24-февраль күнү таңга маал Украина менен Орусиянын ортосундагы кырдаал курчуган. Орусия менен Украинанын кагылышуусу башталгандан бери Украина 2 миң 870 аскерин жоготсо, Орусиянын 498 аскери каза болгону жазылды. Украинадагы акыркы кырдаалга байланыштуу качкындардын саны 1 миллион адамды түздү.