"Путинге спорттук кийимчен жолугуп". Рамзан Кадыров жылдар бою кандай өзгөрдү? Чеченстан башчысынын кадрлары

Чеченстандын башчысы Рамзан Кадыров Украинадагы учурдагы кырдаалда негизги фигуралардын бирине айланды. Ал согуш болуп жаткан аймактан чечен аскерлери менен көптөгөн сүрөттөрдү жана видеолорду жарыялап жатат. Ошондой эле Кадыров өзү Мариуполь шаарына барып, жакын арада шаар толук көзөмөлгө алынарын айткан.

Мындан 18 жыл мурун, тагыраагы 2004-жылдын май айында ал атасы, Чеченстандын президенти Ахмат Кадыровдун көлөкөсүндө кала тургандай болгон. Бирок Ахмат Кадыров Жеңиш күнүн майрамдоо учурунда Грозныйдагы "Динамо" стадионунда болгон жарылуудан каза болгон. Бул күнү 27 жаштагы Рамзан Кадыров Москвада болчу. Аны мейманканадан түз эле Кремлге алып кетишкен. Ал кийимин алмаштырууга дагы үлгүрбөй, спорттук кийимчен Путин менен жолугушкан. Эртеси Кадыров Чеченстандын өкмөтүнүн төрагасынын биринчи орун басары болуп дайындалган. Бир нече жумадан кийин Центрой айылында Кадыровдун агасы Зелимхан жүрөк оорусунан каза болгон.

Ошол кездеги Чеченстандын премьер-министри Сергей Абрамов жол кырсыгына кабылгандан кийин анын ордуна Рамзан Кадыров келген. Чечен Республикасынын Мамлекеттик кеңеши менен өкмөтү мыйзамды өзгөртүп, 30 жашка чыга элек Кадыров президенттикке ат салышсын деп Владимир Путинге кайрылган.

Бирок Кремль күтүүнү чечип, Алу Алханов республиканын башчысы болуп дайындалган. Бирок анын Кадыров менен тирешүүсү күчөп, жыйынтыгында отставкага кеткен. Андан кийин Владимир Путин Кадыровду республиканын башчысы катары көрсөтүп, 2007-жылдан бери ал Чеченстанды башкарып келет.