Ош шаарындагы мечиттерде уурулук кылып жүргөн адам кармалды

Ош шаарындагы мечиттерде уурулук кылып жүргөн адам кармалды. Бул тууралуу Ош шаардык ички иштер башкармалыгынын басма сөз кызматы билдирди.

Маалыматка ылайык, Ош шаардык ички иштер башкармалыгынын Сулайман тоо милиция бөлүмүнүн кызматкерлери тарабынан Жалал-Абад облусунун Сузак районунун 27 жаштагы тургуну кармалган. Ал Ош шаарына келип, мечиттерге намаз окуганы келген жарандардын алаксып калгандыгынан пайдаланып, алардын телефон, акчаларын, сумкаларын уурдап жүргөн.

Бүгүнкү күндө жабырлануучулардын саны 20га жакын. Кармалган жаран уурдалган буюмдарын арзан баада соодагерлерге өткөрүп берип турган.

3-апрель күнү шектүү убактылуу кармоочу жайга киргизилип, тиешелүү тергөө иштери башталган.

Тергөө кызматынын алгачкы маалыматына караганда шектүү буга чейин Бишкек шаарында дагы ушундай кылмышы үчүн соттолуп чыккан.