Таласта таксистти отвертка менен сайгылап кыйнап жүгүн тартып алышты

Таласта таксистти отвертка менен сайгылап кыйнап жүгүн тартып алышты. Бул тууралуу облустук милициянын басма сөз кызматынан билдиришти.

Маалыматка ылайык, окуя 25-мартта Талас шаарынын батыш тарабында жайгашкан “Алтын-Казык” соода борборунун алдында болгон. Анда Талас районунун Орто-Арык айылынын 42 жаштагы тургунун белгисиз 2 адам коркутуп, кийин отвертка менен сайгылап кыйнап, уюлдук телефонун, 50 миң сомун, 10 литр мотор майын жана автоунаанын фильтрин күч колдонуп алып коюшкан.

Жабырлануучу таксист болгон, Бишкек-Талас каттамында адам жеткирип Таласка келген. Тонолгон акчаны Бишкектен Таласка жеткирүүнү өтүнүп берип жиберген башка адамдарга таандык болгон.

Бул окуя боюнча 206-берене (тоноочулук) менен кылмыш иши козголгон.

Кийин шектүү катары Көк-Ой айылынын 1989-жылы төрөлгөн Т.Н. жана 1995- жылы төрөлгөн Б.Д. аттуу адамдар кармалган.

Учурда алар ички иштер бөлүмүндө сурак беришүүдө.