Ош технологиялык университетинде жазуучу Чыңгыз Айтматовдун 85 жылдыгына арналган кароо-сынак болуп өттү

Кечээ, 26-ноябрда Ош технологиялык университетинде залкар жазуучу Чыңгыз Айтматовдун 85 жылдыгына карата окуу жайдын факультеттер арасында “Алп ааламы Чыңгыз Айтматов” аттуу кароо-сынак болуп өттү. Аталган иш-чара окуу жайдын мамлекеттик тил кафедрасы тарабынан уюштурулуп, ага окуу жайдын жетекчилиги жана студенттер катышышты. Сынакта факультеттердеги окутуучулардан жана студенттерден куралган  8 команда өнөрлөрүн тартуулашты. Жобого ылайык, сынакта командалар тарабынан даярдалган жазуучунун чыгармалары тууралуу дубал гезиттери илинип, сахналаштырылган көрүнүштөр, көркөм окуу жана обондуу ырлар жаңырды. Жыйынтыгында 1-орунга технология жана жаратылышты пайдалануу факультети дипломго жана 5000 сом акчалай сыйлыкка ээ болушту. Ал эми 2-орунду инженердик курулуш факультети ээлеп, диплом жана 3000 сом акча менен сыйланды. 3-орун энергетика факультетине буйруп, алар диплом жана 1500 сом алып кетишти. Бул тууралуу аталган окуу жайдын басма сөз кызматы билдирди.