Улуу Ата Мекендик согуштун ардагерлерине 100 миң сомдон жардам берилет

Президент Садыр Жапаров Улуу Ата Мекендик согуштун ардагерлерине бир жолку материалдык жардам көрсөтүү үчүн каражат бөлүү жөнүндө жарлыкка кол койду. Бул тууралуу президенттик администрациядан билдиришти.

Ага ылайык, Улуу Ата Мекендик согуштагы Жеңиштин 77 жылдыгынын урматына Улуу Ата Мекендик согуштун ардагерлеринин төмөнкү категорияларына 100 миң сом өлчөмүндө бир жолку материалдык жардам көрсөтүү үчүн президенттик фондунан 10 миллион 807 миң сом тапшырылат:

- Улуу Ата Мекендик согуштун майыптарына;

- Улуу Ата Мекендик согуштун катышуучуларына;

- Экинчи дүйнөлүк согуш мезгилинде фашисттер жана алардын союздаштары тарабынан түзүлгөн концлагерлердин, геттолордун жана башка мажбурлап кармоо жайларынын мурдагы жашы жете элек туткундарына;

- 1941-жылдын 8-сентябрынан тартып 1944-жылдын 27-январына чейинки блокада мезгилинде Ленинград шаарынын ишканаларында, мекемелеринде жана уюмдарында иштеген жана “За оборону Ленинграда” медалы менен сыйланган адамдарга, ошондой эле “Жителю блокадного Ленинграда” белгиси менен сыйланган адамдарга.

Мындан тышкары 9-майга карата жогоруда аталган категориядагы адамдарга 20 миң сом өлчөмүндө жыл сайын кошумча бир жолку акчалай жөлөк пул, ошондой эле эсептик көрсөткүчтүн алты эселенген өлчөмүндө жана төрт эселенген бир жолку акчалай жөлөк пулдарды алышат.

Маалым болгондой, 1-февралга карата өлкөдө Улуу Ата Мекендик согуштун ардагерлеринин жалпы саны 107 адамды түзөт.