Жантөрө Сатыбалдиев ШКУнун өкмөт башчылар кеңешинин отурумуна катышуу үчүн Ташкентке учуп кетти

Кыргыз Республикасынын Премьер-министри Жантөрө Сатыбалдиев Шанхай кызматташтык уюмунун өкмөт башчылар кеңешинин 12-отурумуна катышуу үчүн Ташкентке учуп кетти. Бул тууралуу 28-ноябрда өкмөттүн басма сөз кызматы билдирди.

Ташкенттеги жолугушуунун катышуучулары ШКУга мүчө өлкөлөрдүн иштиктүү кызматташуусун тереңдетүү маселелерин талкуулашат. Транспорт тармагында өз ара мамилелерди кеңейтүү, ишенимдүү транспорттук-логистикалык чынжырларды жана коридорлорду түзүү келечегин кароо пландаштырылууда.

Мындан сырткары эл аралык ташууларга ыңгайлуу шарттарды түзүү тууралуу өкмөттөр аралык келишимге кол коюу күтүлүүдө. Иш-чаранын алкагында катышуучулардын бир катар эки тараптуу жолугушуулары пландаштырылган.

ШКУга мүчө өлкөлөрдүн делегация башчыларынан тышкары бул жыйынга ШКУнун байкоочу өлкөлөрү – Монголия, Пакистан, Индия, Ооганстан, Ирандын жана БУУнун, КМШнын өкүлдөрү катышат.