Кримтөбөл "Женгого" таандык уюшкан кылмыштуу топтун мүчөлөрү кармалды (фото)

Эл аралык баңгизат каналына тиешеси бар К.Досоновго таандык уюшкан кылмыштуу топтун мүчөлөрү кармалды. Бул тууралуу УКМКнын басма сөз кызматынан билдиришти.

Маалыматка ылайык, 21-май күнү К.Досоновдун уюшкан кылмыштуу тобунун үч мүчөсү: А.У.Т., М.у.М., жана Т.Ж.А. “Тажикстан-Кыргызстан-Өзбекстан” багытында эл аралык баңги каналына катышуусу бар деп УКМКнын тергөө абагына камакка алынган.

“Ош облусунун тургундары тарабынан жогоруда аталган каттам боюнча эл аралык баңги каналын түзүшкөнү аныкталган.

2022-жылдын 21-майында УКМК кызматкерлери жүргүзгөн ыкчам-издөө иш-чаралардын негизинде текшерүү жүргүзүлүп, “Азия Ойл” май куюучу жайынын аймагынан Мерседес-Бенц үлгүсүндөгү автоунаанын жанынан сары скотч менен оролгон, өзгөчө жыты бар жалпы салмагы 1 килограмм 980 граммды түзгөн зат (болжол менен “гашиш”) табылган”, - деп жазылган маалыматта.

Учурда кармалгандар Баткен шаарындагы убактылуу кармоочу жайга киргизилип, баңги каналынын башка катышуучуларын аныктоого багытталган ыкчам-издөө иш-чаралары жүргүзүлүүдө.