Өзбекстандык ырчы Наргиз Закирова Москвадагы аэропорттон кармалды

Орусияга бара жаткан өзбекстандык ырчы Наргиз Закирова Москвадагы аэропорттон кармалып, артка кайтарылды. Бул тууралуу орусиялык басылмалар жазып чыкты.

Маалыматка ылайык, 51 жаштагы ырчы Ташкенттен Москвага учуп барган. Милиция аны "Домодедово" аба майданынан кармап, өлкөгө кирүүсүнө уруксат берген эмес.

"Бийликтин көрсөтмөсү менен Закирова мекенине (Өзбекстанга) депортацияланат", - деп айтылат андагы маалыматта. Бирок мунун себеби айтылган эмес.

Белгилей кетсек, Наргиз Закирова 2013-жылы Орусиянын "Голос" теле сынагында 2-орунду ээлеген. Ырчы айым АКШнын жарандыгын да алганы белгилүү. Буга чейин ал 2017-жылы Крымдагы концертинен улам Украинанын "кара тизмесине" алынып, аталган өлкөгө кирүүсүнө толугу менен тыюу салынган.