Бишкекте "Ош базарынан" эки телефонду уурдаганга шектелген жаран кармалды

Бишкектеги "Ош базарынын" аймагында уурулук фактысына шектелген жаран кармалды. Бул тууралуу Ленин РИИБинин маалымат кызматынан билдиришти.

Маалыматка ылайык, милицияга борбор калаанын тургуну А.Р. арыз менен кайрылган. Анда ал ошол эле күнү саат 17:20 чамасында белгисиз адамдар "Ош базарынан" балдар арабасынын чөнтөгүнөн 12 миң сомдук Самсунг 02С жана 14 миң сомдук Самсунг 02 үлгүсүндөгү уюлдук телефондорун уурдап кетишкендигин билдирген.

Аталган факты боюнча Кылмыш-жаза кодексинин 205-беренесинин (уурдоо) негизинде кылмыш иши козголгон.

"Жүргүзүлгөн иликтөө жана издөө иш-чараларынын жүрүшүндө кылмышка шектүү катары 2000-жылы туулган С.А. кармалып, Бишкек шаарынын ички иштер башкармалыгынын убактылуу кармоочу жайына киргизилген.

Учурда шектүүнүн ушул сыяктуу башка кылмыштарды жасоого катыштыгы бар экендигин аныктоо боюнча тергөө иш-чаралары жүрүп жатат", - деп жазылган маалыматта.