Мейманканадан, базардан... Милиция телефон уурдоого шектелген 24 жаштагы жаранды колго түшүрдү

Бишкекте уурулукка жана тоноочулукка шектүү колго түшүрүлдү. Анын үстүнөн бир эле күндө эки арыз түшкөн дешет Октябрь РИИБдин маалымат кызматынан.

Белгилүү болгондой, 22-июнда эки жаран арыз менен кайрылган.

Шаар тургуну У.А`нын милицияга жазган арызында эртең менен саат 07:50 - 08:50 чамасында Медеров көчөсүндөгү мейманканалардын биринде белгисиз адам телефонун ачык эле тартып алганы айтылган.

Экинчи арызда Д.У. аттуу жаран "Ош базарынын" аймагында таңкы саат 05:30да телефонун белгисиз адамдар уурдап кеткенин белгилеген.

Бул фактылар "тоноо" жана "уурдоо" беренелери менен Кылмыштардын бирдиктүү реестрине катталып, сотко чейинки тергөө иштери башталган.

Ыкчам тергөө иштеринин жүрүшүндө шектүү катары 1998-жылы туулган Б.М. кармалды. Октябрь райондук соту тарабынан ага карата СИЗО-1ге камакка алуу түрүндөгү бөгөт чарасы тандалды.

Милициядан шектүүнүн мындан башка дагы кылмыштарга катыштыгы болушу мүмкүндүгүн, жабыр тарткандар болсо кабар берип коюусун билдиришти.

Байланыш номери: 0(505) 85-64-20, 102.