Манасчылар чокуга чыгып 7 мүнөт манас айтышты

Талас облусунун Кара-Буура районунунда жайгашкан "Манас" чокусунда улуу баян айтылды. Кыргыз улуттук "Манас" театрынан кабарлашкандай, чокуга манасчылардан тышкары "Кыргыз альпинизм федерациясынын" 11 мүчөсү да чыгышты.

Манасчы Төлөбек Муса уулу чокуга чыгуу, ал жакта улуу баянды айтуу оңой болбогонун белгиледи.

"Чокуга чыкканда оозума сала бердиби, айтор, атайын төлгө кылып "Семетейдин Таласка келишинен" жети мүнөт айтыптырбыз. Чайыттай ачылып турган күн манас айтылып жатканда бүркөлүп, ак карга айланып, угуп жаткан альпинисттер көздөрүнө жаш алганы өзгөчө белги болду", - дейт ал.

"Манас" чокусунун бийиктиги 4488 метр. Манасчылар чокуга чыккан жол "Кыргыз альпинизм федерациясынын" чечими менен "эпос" деп аталды.