Жалал-Абадда экстремизмге шектүү жарандар кармалды

Жалал-Абадда “Экстремист” иш-чарасы жүргүзүлдү. Бул тууралуу Жалал-Абад ОИИБдин басма сөз кызматынан билдиришти.

Маалыматка ылайык, 21-24-июнь күндөрү Жалал-Абад ОИИБдин экстремизмге жана мыйзамсыз миграцияга каршы аракеттенүү кызматы тарабынан “Экстремист” аталышындагы ыкчам-издөө жана алдын алуу иш-чарасы өткөрүлдү.

Анын алкагында мурда экстремизм багытында бир нече жолу соттолгон, “Хизбут-Тахрир” диний экстремисттик уюмунун активдүү мүчөсү жана партиянын каржылоосу боюнча эсепчи катчысы (Накыб жардамчысы) болуп, партиянын акчаларын чогултуп иштеп жүргөн 1977-жылы туулган Базар-Коргон районунун тургуну А.У.нун үйүнө тинтүү жүргүзүлгөн.

Натыйжада далил буюм катары (баракча, китептер, тетрадь, акча каражаты жана чогултулган акча каражатынын тизмеси жазылган блокнот) колдонуп жүргөн 3 даана уюлдук телефондор алынган.

Иш-чаранын жүрүшүндө диний экстремизмдин идеологияларын колдоп, жайылтып жүргөн 8 жаран кармалып, тергөө амалдары жүргүзүлүп, 5 учуру боюнча кылмыш иши тергелип, соттун кароосуна жөнөтүлгөн.

Жүргүзүлгөн алдын алуу жана түшүндүрүү иштеринин натыйжасында жыл башынан бери 22 жаран өз ыктыяры менен бул агымдын мүчөлүгүнөн баш тарткан.