"Чыгыш Электр" ААКсы казынага 20 миллион сомдон көп зыян келтиргени аныкталды

Ысык-Көл облустук прокуратурасы тарабынан жүргүзүлгөн текшерүүдө “Чыгыш Электр” ачык акционердик коомунда олуттуу каржылык мыйзам бузуулар аныкталды. Бул тууралуу Башкы прокуратурадан маалымдашты.

Билдирүүгө ылайык, акционердик коомдун кызматкерлеринин эмгек маяналары жогору ѳлчѳмдѳ жана коомдун кѳрсѳткүчтѳрү чыгашалуу болгондугуна карабастан кызматкерлерге эмгек маянадан тышкары ай сайын сый акы тѳлѳмдѳрү жүргүзүлүп, 2021-жылга карата бекитилген суммадан ашыкча 13 миллион 601 миң 700 сом мыйзамсыз берилип кеткендиги тастыкталды.

Ошондой эле негизги акционер болгон мамлекеттин кызыкчылыгы четке кагылып, коомдун бекитилген эмгек акы фондунда үнѳмдѳлгѳн акча каражаты жок болгондугуна карабастан “Чыгыш электр” коомунун жетекчилигинин буйругу менен энергетиктердин майрамына карата 6 миллион 890 миң сом дагы мыйзамсыз төлөнгөн.

Жыйынтыгында аталган коомдун кызмат адамдарынын мыйзамсыз аракеттеринен улам мамлекетке 20 миллион 491 миң 700 сомдук ѳзгѳчѳ ири ѳлчѳмдѳ материалдык зыян келтирилген.

Бул факты боюнча Кылмыш-жаза кодексинин 245-беренеси "коммерциялык же башка уюмдардын кызматчыларынын ыйгарым укуктарын кыянаттык менен пайдалануусу" менен кылмыш иши козголуп, тергөө амалдары жүргүзүлүүдө.