Кыргызстандык сууда сүзүүчү Денис Петрашов дагы бир алтын медалга ээ болду

Кыргызстандык сууда сүзүүчү Денис Петрашов эл аралык мелдеште 100 метрге сүзүү боюнча алтын байгеге ээ болду. Бул тууралуу Маданият, маалымат, спорт жана жаштар саясаты министрлигинен билдиришти.

Маалыматка ылайык, 12-июлдан 26-июлга чейин Тель-Авивде (Израиль) "Маккабиада" турнири өтүүдө. Аталган турнир төрт жылда бир Израилде өтүүчү Олимпиада оюндары сыяктуу эл аралык спорттук иш-чара болуп саналат.

Мелдеш спорттун 42 түрү боюнча өткөрүлөт. Ага 60 өлкөдөн он миңден ашуун спортчу катышууда.

Белгилей кетсек, ушул эле мелдеште Денис Петрашов 200 метрге брасс стилинде сүзүүдө 1-орунду багындырган.