Новосибирскте бычакталган 17 жаштагы кыз: Кыз менен жигиттин ортосундагы жаңы жагдайлар белгилүү болду

Орусиянын Новосибирск шаарында көчөдөн эле кызганычтан улам 17 жаштагы кызды бычактап салган жаран кыз менен бир жарым жылдан бери сүйлөшүп жүргөн. Бул тууралуу "Комосомольская правда" басылмасы ишенимдүү булактарына таянуу менен жазды.

27 жаштагы жигит каза болгон кыз менен таанышканда өзүнүн чыныгы атын айткан эмес. Ал өзүн Рома деп атап алган. Каза болгон кыз мектеп окуучусу болгон. Анын ата-энеси 10 жаш улуу жигит менен болгон мамилеси тууралуу билишкен. Ал тургай алар Тажик жаранына жергиликтүү супермаркетте жумушка орношууга жардам беришкен.

Ошондой эле кызды бычактаган жаран зордук-зомбулукка, ичимдикке жакын болгон. Тагыраагы, 2019-жылы декабрь айында ал мурдагы сүйлөшкөн кызына бычак менен кол салган. Бирок жаза мөөнөтүн толук өтөбөй эркиндикке чыгып кеткен.

Кырсык катталган күнү кыз жигити менен болгон мамилесине чекит коюу үчүн сүйлөшүүгө барган. Жыйынтыгында экөөнүн ортосунда чыр чыгып, ал кызды бычактаган.

Буга чейин социалдык тармактарда жигит кызды кубалап келип жыгып, андан кийин бычактап салганы көпчүлүктүн үрөйүн учурган. Кийинчерээк шектүү Тажикстандын жараны экени белгилүү болгон.