Ысык-Көлгө чөгүп кеткен 4 жашар кыз дагы деле табыла элек

Ысык-Көлгө чөгүп кеткен 4 жаштагы кызды издөө иштери уланууда. Бул тууралуу Өзгөчө кырдаалдар министрлигинин басма сөз кызматынан кабарлашты.

Маалыматка ылайык, бүгүн эртең менен саат 08:00дөн тарта наристени издөө иши башталып, анда Өзгөчө кырдаалдар министрлигинин куткаруучулары 3 топко бөлүнүшкөн.

Биринчи топто Балыкчы шаарынын өзгөчө кырдаалдар бөлүмүнөн 4 куткаруучу тартылып, Тоң районунун Шор-Булак айылынан Балыкчы шаарына чейинки аралыкта издөө иштерин жүргүзүүдө. Экинчи топко Тоң райондук өзгөчө кырдаалдар бөлүмүнөн 4 куткаруучу тартылып, райондун Шор-Булак айылынан Бөкөнбаев айылына чейинки аралыкты, үчүнчү багытта Ысык-Көл райондук ӨКБнөн 2 куткаруучу тартылып, Чолпон-Ата шаарынан Тору-Айгыр айылына чейинки аралыкта издөө иштерин жүргүзүп жатат.

Жалпы 10 куткаруучу, 2 АСМ авто унаасы жана 3 моторлуу кайык менен издөө иштери уланууда.

Белгилей кетсек, 18-июль күнү Ысык-Көлдөгү Тору-Айгыр менен Чырпыкты айылдарынын ортосунда 2018-жылы туулган Н.А. аттуу кыз көлгө чөгүп кеткен.

Изделип жаткан 4 жаштагы кыздын атасына байланышканыбызда, издөө иштерине дрон жана ыктыярчылар тобу тез арада керек болуп жаткандыгын билдирген.

Издөө иштерине жардам берүүнү каалагандар кыздын атасына байланышса болот: Сабыр - 0705-60-37-04, 0555-99-56-26.