Өзбекстанга мыйзамсыз бодо мал айдап өтүүгө аракет кылгандар кармалды

Жалал-Абад облусунда бодо малдарды Өзбекстандын аймагына мыйзамсыз айдап өтүүгө шектүү жарандар кармалды. Бул тууралуу Мамлекеттик чек ара кызматынан билдиришти.

Маалыматка ылайык, 30-июлда Жалал-Абад облусунун Аксы районунда Чек ара кызматкерлери тарабынан 13 баш бодо малды Өзбекстандын аймагына мыйзамсыз айдап өтүүгө аракет кылган 1992-жылы туулган Кыргыз Республикасынын жараны А.у.Н. кармалды.

Бүгүн, 1-августта Ала-Бука районунун Актам участкасында чек арачылар 21 баш бодо малын Өзбекстандын аймагына айдап бара жаткан жеринен Аксы районунун Кара-Дөбө айылынын 1989-жылы туулган тургуну С.К.ны кармашкан. Алдын ала маалыматтар боюнча, кармалган бодо малдын жалпы баасы 3 миллион 725 миң сомду түзгөн.

Эки учурда тең тиешелүү документтер толтурулгандан кийин кармалган жарандар жана бодо малдар компетенттүү органдардын кызматкерлерине өткөрүп берилди.